Metek Punduik duduk mayuduik di Kadai Uncu Toad sambia maliek hape. Alah satangah jam labiah inyo sibuk mamencet-mencet hape. Apo kolah nan di carinyo.
Kok kopi bakato kopi, alah marapuang langau di dalamnyo. Rusah bana rono gaek tu.
Lah bantuak kamatian bini sajo. Samantaro baru sabulan ko dapek gadih tuo, sapaningga urang rumah taun kapatang.
“Baa kok rusuah bana bantuak Metek. Kanai sampiangan lalok dek urang rumah?” Kicek Utiah sambia manggigik rakik maco.
“Iko Tiah ha, anak indak puo dapek sikola do ha. Alamaik ka suasta pulo nah,” jawek Metek Punduik.
“Ha, lai dakek dari SMA 4 nah,” sambung Utiah.
“Nomor 260 anak ko. Nan ditarimo 250. Baa aka lai ha,” kicek Metek.
“Ko dek zonasi mah nak. Antah apo-apo sajo sistim masuak sikola kini. Batuka menteri batuka pulo aturan.”
” Lah lenyai urang dek e,” semba Yuang Umbai nan kanakannyo indak pulo di tarimo di sakolah tu.
***
Kurenah zonasi PPDB SMA/SMK tiok tahun pasti bamasalah. Baiak panarimoaan malalui jalur prestasi ataupun zonasi.
Ado sajo caro nan di lakuan urang gaek atau okum sikola bia anak-anaknyo bisa di tarimo di sakola negeri. Baiak caro prestasi maupun zonasi.
Kok dari sikola, sabalunnyo Ado kasus SMP negeri nan mandongkrak niai rapor, bia luluih di jalur prestasi.
Carito Sabalunnyo: Katiko Pajabaik Raun Sabalik
Samantaro untuak zonasi, banyak urang gaek nan mamindahan KK atau domisili di dakek sikola, bia luluih.
“Kadang indak mangarati ambo jo menteri atau dinaih pendidikan ko. Lah jaleh mangicuah, nyo luluihan juo nah,” kiniko Uncu Toad nan manyemba.
“Baa ka indak dek Metek, lah jaleh mamindahan KK ko mangicuah karajo. Dek arok anak luluih, ha bapindahan KK sajak satahun nan lalu.”
“Samantaro anak tu, tingga jo urang gaek e, nan KK batompangan ka urang lain. Samantaro lah punyo surek pindah domisili, e inyo tingga lai di alamaik nan lamo. Ndak mangicuah namoe tu,” kicek liau panjang leba.
“Baa lai Ncu, lah Taka itu pulo kurenah e. Kok lai ado nan badagok, bisa pulo masuak katiko pengumuman kelulusan lah kalua. Kan ado berita e di media online tu,” baleh Utiah.
***
Masalah panarimoaan murik SMA/SMK sistem prestasi jo zonasi ko mambuek urang gaek naik darah.
Apo lai nan tingga jauh dari sikola. Tiok taun masalah taka iko tajadi. Tapi, indak ado solusi dek pemerintah.
Itu tajadi dek indak cukuik sarato maratonyo sikola negeri di masiang-masiang kecamatan.
Sistem zonasi baru bisa bajalan, kutiko jumlah sikola di satiok kecamatan alah cukuik jo marato.
Kok taka kini, banyak kecamatan nan kakurangan sikola negeri. Ujuang-ujuangnyo, indak bara murik nan di tarimo, sisonyo harus basikola di suasta.
“Kok di suasta iyo agak barek Tiah. Nan karajo Iko pulo nyoa. Kadang lai laku galeh, kadang tauncang.”
“Kamanga wak lai, amuah he di sewoan pulo lapak ciek di sikonyo. Di suruah anak tu maonggok lado lai,” kicek Metek sambia mamasan kopi satangah lai.
“Jaan Metek, Baa ka baa anak harus tetap sikola. Baa pun kondisinyo. Manyasa beko,” jawek Uncu Toad maagiah saran.
Metek Punduik nan mandapek saran dari kantinyo, hanyo bisa maaanguak-anguakan kapalonyo.
“Di cubo lah lu Ncu, kok indak tabayia sikola di pabinian se nyo lai,” Jawek Metek bantuak lah abih aka. (Sutan Mudo)
